162. In sancti Philippi.

1. Fulget coruscans ut sidus exuberans
Candens Eosque missus inter omnibus,
Praedicat gentes lumen verum sanctius
Repletque omnes cunctis mirabilibus
Prodigiorum gestansque miraculum.

2. Hic est Philippus, beatus apostolus,
Qui praedicavit Scythis evangelium,
Bis denis annis post Christi ascensionem
Receptas fuit ad Martis statuam,
In qua stabat draco ingens pessimus.

3. Fiunt virtutes per manus apostoli:
Duo tribuni, quos draco prostraverat,
Seu filius sacrificans pontificis
Recuperabant prospera libertatis
Et reddunt Deo gratias multimodas.

4. In locum dirum, quo draco steterat,
Benigne iussit, ut vexilla collocent,
Virtutes magnas imperat acquirere;
Tunc draco ipse, qui praeerat saevius,
In Christi laudem solitudo permanet.

5. Per manus sancti Philippi apostoli
Omnes delicta paenitendo proferant;
Suscitat functos et curat qui morbidos,
Et ipse illis tempus magnum praedicat,
Ut sic ad Christum spiritumque deferat.

6. Auditum fecit Domini magnalia,
Quomodo venit virgineque prodiit,
In mundo isto miraculis claruit
Et post in finem passionem suscepit,
Inde resurgens et ad polum rediens.

7. Post haec beatus vocat ad se populos,
Levitas iubet, sacerdotes fieri,
Deorum templa nimia destruere
Ecclesiarumque sancta erigere,
Haereticorum de errore redire.

8. Ex tunc ad Deum emisit spiritum
Et duae eius virgines et filiae,
Haec luce saeptus scivit inspiramine,
Humatur quoque sepulcrali lumine,
Ibi provisum Dei manet gloriae.

9. Te exoramus, sancte Christi Domini,
Ut hic patronus intercessor praemices
Pro cunctis servis, Christianos adiuves,
Ut in hoc mundo tutelam adhibeas
Et in praesenti requiem adcumules.
10. Recipiant ut functi omnes veniam,
Quietem pacis et tranquillam gratiam,
Et, qui hanc laudem condidit, libertatem;
Per intercessum precantis apostoli
Sit exauditor Iesus Christus Dominus.

11. Sit laus patri, potentia, deitas
Sit filio scientiae in laudibus,
Sint paraclito sempiterna carmina
Essentiaeque indivisa gloria
In omni aevo per aeterna saecula.