92. De sancto Cataldo.

1 a. Cogis linguam fari laudes,
O Catalde, tu qui gaudes
In caeli rosario.

1 b. Haec est rosa nobis fragrans

Et ardore sibi flagrans

Virtutis incendio.

2 a. Nos virtute protegit
Et exemplo dirigit
Sicut pastor bonus.

2 b. Lapsos, fractos erigit
Et electos dirigit,
Tarenti patronus.

3 a. Cadat coetus hostium,
Cedat metus pestium
Praesulis virtute ;

3 b. Cedat fletus tristium,
Fiat laetus omnium
Cuneus salute.

4 a. Per te salus sit aegroto,
Sitque robur debili,
Portus navigantibus.

4 b. Satisfiat nostro voto,
Et sit clero nobili
Mentium in laudibus.

5 a. Tu patronus et praelatus,
Tu confessor es beatus,
Tu pastor egregius ;

5 b. Si patronus es, defendas,
Si praelatus es, intendas
In nobis salubrius.

6 a. Confessoris vicem geras,
Ut salutem nobis feras,
Qua beari credimus.

6 b. Pastor pastum praebe caeli
Tuo gregi sic fideli,
Nam ad te recurrimus.

7 a. In praesenti saeculo

Pacem a te poscimus,
Ut tuti periculo

Te, quem vere colimus,
Colamus sollemniter.

7 b. Effectum da precibus,
Ut salutis pretium
Sit ex tuis laudibus ;
Sic ad vitae praemium
Nos trahas perenniter.