93 De sancta Christiana.

1 a. Christianae virginis
Festa colat fidelis
Christiana contio,

1 b. Revoluta hodie,
Resoluta sint inde
Peccatorum vincula.

2 a. Laudet ecclesia

Hanc devoti cantus melodia

2 b. Dignam laude, quia

Pia, casta fuit et sobria.

3 a. Nata regis haec Anglorum
Fuit et reginae, quorum
Sola heres aderat ;

3 b. Rituque praedecessorum
Cultum gessit idolorum,
Nam pagana fuerat.

4 a. Angelus hanc visitat,
Visitatam incitat

Ad baptismi gratiam.

4 b. Visitata respuit,
Incitata renuit
Idolorum latriam.

5 a. Baptizatur
Et vocatur
Christiana,
Quae pagana

Adulescens fuerat,

5 b. Consolatur
Et hortatur
Ad baptisma
Et ad chrisma

Puellas, quas noverat.

6 a. Divino inspiramine,
Presbyteri hortamine
Reliquit cultum Veneris.

6 b. Christiana nomine
Nomen hoc regimine
Sui complet operis.

7 a. Fidem haec ab angelo
Discit et presbytero,
Quam consortes docuit,

7 b. Hortans has omni zelo,
Ut credant Deo vero,
Quem silenter coluit.

8 a. O, quam tanta probitas
Ornat et virginitas,
Ora, ut sit sanitas
Nobis et prosperitas.

8 b. Absit nobis vanitas,
Quam cupit humanitas ;
Insit nobis veritas
Et perfecta caritas.