104. De sancto Cyrico.

1 a. Puer natus est Cyricus,
Cuius ordo caelicus
Laudat puerperia ;

1 b. Vere puer, Deum verum
Christum sequens puerum
Senex in infantia.

2 a. Miro modo legem docens,
Nocentibus innocens,
Praedicans caelestia,

2 b. Nondum iuventutis flore,
Immo lactis tempore
Tractus ad supplicia.

3 a. Infans vir Israelita,
Cuius genetrix Iulitta
Nobilis, propitia,

3 b. Dogma promens spiritale
Natum trahit ad natale
Morte Christi praevia.

4 a. Cuius mors Cyrici vita,
Dum per mortem intrat ita
Vitae natalitia.

4 b. Ante tempus meritorum
Dies lactis, dies florum
Fructus ferunt praemia.

5 a. Felix mater, felix natus,
Non timentes cruciatus,
Sed pro fide Christi bella

5 b. Sustinendo patientes,
Patienter sustinentes
Famem, frigus et flagella,

6 a. Tandem mortem pretiosam ;
Ita Christus rosa rosam
Legit ad caelorum serta.

6 b. Ecce, nunc tempus rosarum,
Ut ad gloriam earum
Nos invitet fides certa.

7 a. O felices, O beati.

Qui pro Christo passo pati
Meruerunt talia:

7 b. Ignem, ferrum, diversorum
Exquisita tormentorum,
Ad mortem flagitia I

8 a. Sacramentis nondum novis
Istos signant agnus ovis
Eorumque victima.

8 b. Iste puer martyr magnus
Quasi legis sacer agnus
Die quartadecima.

9 a. Item iuxta legis foedus
Istum caesus signat hoedus,
Istam rufa vitula ;

9 b. Agnus figurabat Christum,
Christus agnum fecit istum,
Agnum sine macula.

10 a. Hic agnus occiditur,
Qui cum ove sequitur
Agnum ante saecula;

10 b. Sic currunt ad bravia,
Quorum haec sollemnia
Recolit ecclesia.

11. Eorum constantia
Gratiam cum gloria

Nobis praestet, Alleluia.