102. In sancti Clementis.

1. Clementis festum celebratur hodie,

Venite, plebes, et mirate compotem

Asseclam Petri, Domini apostoli,

Romanae sedis tertium antistitem,

Quem sibi Christus consecravit martyrem.

2. Hic habitando in urbe Romulea,

Adnuntiando Iesum Christum Dominum

Illuminavit Theudorum Sisinium,

Dum viso Petro orans ipse prospicit,

Sic a Clemente baptizatus credidit.

3. Hic praedicando Christi evangelium

Et convocando catervas fidelium

Traiani iussu ducitur exsilium

Trans Pontum mare in praeruptum eremum ;

Ibi peregit insigne miraculum.

4. Aquarum venas ex abysso eduxit

Et satiavit sitientes incolas,

Qui per metalla excidebant marmora

Et aestuabant tabe siti valida

Pro Christi nomen portantes supplicia.

5. Quos ubi cernit beatus pater bino

Poculum ferre sibi miliario,

Hortatur cunctos praedicandum Dominum,

Ut suis fontem aperiret laticum,

Sacris salubrem mire confessoribus.

G. Quorum oblata dum litaret immolans

Sacer antistes, meritis insignior,

Agnum astare cernit sibi Dominum

Signantem locum, quem ut idem pupugit,

Elicit undam adfluentem in fluvium.

7. Haec fama cunctas per gyrum provincias

Complens [mox] plebes ad credendum excitat

Quae confluentes suscepto baptismate

Capiunt normam fidei catholicae

Condunt et aedes quindecenas quinquies.

8. Ob hoc crescente aemula invidia

Profundum maris mergitur cum ancora;

Ibi humatur sepulcrali camera,

In qua receptus; exstat nunc ecclesia,

Ubi fideles confluunt per saecula.

9. Qui cursu anni tectus aqua valida

Alto in mari subtus undas latitat;

Cuius recurrens annua festivitas

Recedens mare fere tria milia

Per septem dies vias praebet fulgidas.

10. Cuius sepulcrum velut aurum rutilat,

Ancora colli ut argentum emicat;

Facit virtutes per fideles petitas

Agentes Deo gratias multimodas,

Qui praestat sanctis tanta mirabilia.

11. Te ergo, Clemens, martyr alme, supplices

Agonis tui celebrantes gaudia,

Te hodierno poscimus cum fletibus,

Ut reis assis, succurras labentibus.

Ac per te culpae careamus cumulo.

12. Exemplo tuo versi a peioribus

Ad meliora contendamus iugiter,

Optimiora ambientes dignius

Mandata vitae servemus, felicius

Ut post sanctorum adunemur coetibus.

13. Christum rogemus, verbum patris unicum,

Et obsecremus almumque Spiritum,

Ut mundi procul auferat iactantiam,

Virtutum nobis donet abundantiam,

Per quam aeternam mereamur gloriam.

14. Gloria patri, gloria sit filio,

Gloria sancto procedenti spiritu,

Qui Deus unus regit mundi machinam,

Disponit cuncta revolvenda tempora

Tenetque regnum perpetim per saecula.

In Nr 180:

Praesta, quaesumus, unita potentia

Replensque globi cunctam solus machinam,

Virtute firmans, ingens adest(o) gloria,

Aeterna cuius laus et clementia

Et honor iugis affatim per saecula.