107. De sancto Dionysio.

la. Salve, pater Dionysi,
Lux et decor paradisi,
Laus et decus Galliae;

1 b. Praeco vitae, tuba caeli,
Fax amoris, fornax zeli,
Fons et flumen gratiae.

2a. Cleri iubar et acumen,
Flos, speculum et cacumen
Sapientum Graeciae,

2 b. Mente legens caeli numen

Ut aquila solis lumen

Non aversa facie.

3 a. Tu transcendens hominem
Claritate spiritus,

3 b. Elucidans ordinem

Caelestis exercitus.

4 a. Tu Seraphim caritatis
Sitim et incendium,

4 b. Tu Cherubim claritatis
Investigas radium.

5a. Tu thronorum firmitatem,
Tu distinguens dignitatem
Assignatam ceteris,

5 b. Vim, naturam, puritatem,
Opus, motum, potestatem
Excellenter disseris.

6 a. Ergo, rosa gloriosa,

Binis cum sodalibus

6 b. Fer devota nostri vota

Clemens in caelestibus,

7 a. Ut, qui tui passionem

Veneramur et agonem

Vernantis victoriae,

7 b. Contemplemur post laborem
Fructum ventris, caeli florem,
Christum, regem gloriae.