112. De sancto Domitiano.

la. Confessorum regi, Christo,
Grex iustorum die isto
Laudum det praeconia.

1b. Domitorem vitiorum,

Domus civem supernorum
Celebret ecclesia.

2 a. Qui Gallorum doctor sanus
Dictus est Domitianus
Mundi domans vitia ;

2 b. Clara stirpe procreatus,
Vita, fide decoratus
Christi fulsit gratia.

3 a. Ad honorem praesulatus
Et Traiecto postulatus
Functus sacerdotio

3 b. Terram lustrat vir insignis,
Gentem salvat, splendet signis,
Novae lucis radio.

4 a. Turbam pascit egenorum
Pius pater orphanorum
Probatus per omnia.

4 b. Deo preces offert iuges,

Fundit imbres, confert fruges,
Vitae victualia.

5 a. Ex virtute deitatis
Reddit tutae sanitatis
Languidis remedia.

5 b. Visitans Aurelianum

Perversorem, dogma vanum
Depulit a patria.

6 a. Emendatos christianos,
Confirmatos, fide sanos,
Durat ex perfidia.

6 b. Horum mundum disciplina
Docens replet et divina
Spiritus clementia.

7 a. Anguem fugat venenatum
Vulnus sanat vulneratum
Daemonis astutia

7 b. Fontem facit salutarem,
Laudem fugit saecularem
Humilis constantia.

8 a. Servus prudens et fidelis
Consolatus est de caelis
Dei providentia.

8 b. Pane vivo confortatus
Carne liber est translatus
Ad sanctorum gaudia.

9 a. Corpus digne tumulatur.
Salus aegris reparatur
Peste pressis varia.

9 b. Hic in cunctis clemens, bonus
Pastor gregis et patronus
Colitur cum gloria.

10 a. Sancte praesul et confessor,
Heres Christi et consessor,
Sis pro nobis intercessor
Ad aures clementiae.

10 b. Plebis decus christianae,
Nostra spes. Domitiane,
Fac nos vitae pasci pane
Cum colonis gloriae.