114. De ss. VII Dormientibus.

1. Hos saepius visitavit
Martinus et confortavit
Morte iam deposita.

2 a. Ad hos nocte dominica,
Transitus sui crastina,
Apparuit item ita

2 b. Dicens: phalanx angelica
Reddet in die crastina
Vobis secundum merita.

3 a. Viatico paremini,
Cras egrediemini
De carnis ergastulo.

3 b. Labem carnis ut nescitis,
Sic nec caro erit tristis
In mortis articulo.

4 a. Cuius dicta sunt completa,
Nam, ut dixit, venit laeta
Civium caeli contio,

4 b. Quae odoris fraglantia
Replevit cellam nimia
Septem dierum spatio,

5 a. Qua aegroti sunt sanati,
Venientes et allati.
Hi data eucharistia

5 b. In prece se prostravere
Et ibi obdormivere
Recipientes praemia.

6 a. Facies horum virore
Ita erant speciosae,
Vivi semper aestimati,
Ut solebant, sunt vocati
Per septem sedilia.

6 b. Ligari fugit calculo
Velut saburra pontica.
Eorum morte mystica
Quod fecit Deus populo
Miraculorum milia.

7 a. Siquis adhuc mente digna
Quaerat, illis digne digna
Mox sentiet suffragia,
Horum quae pro memoria
Dabit Dei clementia.

7 b. Octava die Bricius

Cum monachis honestius
Et clericis, quos vocavit,
Sicut nunc sunt, tumulavit,
Cum sint in caeli gloria.

8 a. Clemens Dei clementiam
Impetret, Primus gratiam
Atque Laetus laetitiam,
Theodorus laudem diam;

8 b. Sint per Gaudentem gaudia,
Per Gyriacum venia
Detur et innocentia
Innocentis prece pia.