112. In sanctae Euphemiae. .

1. En, festam prodiit virginis inclitae

Micans Eufemiae, martyris optimae;

Omnes nuuc populi psallite modulis

Reddentes vota gnaviter.

2. Obcurrens Dominus, purget ut intima,

Clemens attribuat munera gratiae,

Qui se nunc militum carmina promere

Sanctorum parant laudibus.

3. Haec namque Domino augusta serviens

Semet dum dedicat principi caelico,

Livore daemonum pungitur ilico,

Ne Christum voce praedicet.

4. Felix Eufemia sed pia permanens,

Ad illam perfidus ut venit rugitu,

Munitur subito munere spiritus

Et mente clara redditur.

5. Pudica moribus, inclita genere,

Immixta populis Chalcedonensibus,

Ut Christo militet, mente deliberat,

Ut virgo quoque maneat.

6. Sed hostis nascitur, ipse qui invidus

Furorem iudicis concitat invidi,

Sanctam ut idolis tura libaminis

Offerre cogat impie.

7. Virgo sed sociis iuncta piissimis,

Quos septem numero septies indidit

Dicatos nisibus passioni martyrum,

Certamen laeta suscipit.

8. Flammas ingreditur, cingitur ignibus,

Se Christo reddere vocibus intonat,

Caelestem gratiam (ut) flectat orantibus

Persolvens vota laudibus.

9. Illaesa prodiens carcere truditur;

Mirantur milites talia comminus

Vidisse, sed praesul ipse nec territus

Saevius monet aliter.

10. Harena subito ponti demergere

Dicatam Domino virginem imperat,

Insontem rabidus perdere cupiens,

Et martyr vota solvere.

11. Sed martyr Domini talia sustinens

Iam suum spiritum suscipi cogitat,

Ut mixta caelitus agmina martyrum

Valeret vota consequi.

12. Unde nunc avidi, virgo, te gnaviter

Oramus populi, lavacri filii,

Mittensque miserans caelica munera

Piorum preces audias.

13. Iam, Christe, miseris esto misericors

Et sanctae meritis solve piacula

Nobis perpetua gaudia tribuens,

Domine Deus, omnibus.

14. Sit trino Domino gloria sedula,

Regnum perpetuum atque potentia,

Virtute solita qui regit omnia

Sustentans pie condita.