119. De sancto Edmundo Ep.

1 a. Ad honorem summi regis
Vox devoti psallat gregis
Pastoris sollemnia ;

1 b. Sancti praesulis Edmundi
Clara voce laetabundi
Pangamus praeconia.

2 a. Quem, dum aetas iuvenilis
Floret, ornat mens senilis,
Sancta pascunt studia.

2 b. Hunc adultum spes matura,
Verus amor, fides pura,
Morum vestit gratia.

3 a. Vitas patrum imitatur,
Sanctus sanctis similatur
Meritorum cumulo;

3 b. Quia Deo famulatur,
Illum Deus veneratur
Intuente populo.

4 a. O laudanda Dei dona,
Fulget virtus in corona
Sanctitatis infula ;

4b. Tutor factus libertatis
Tutus dormit cum beatis,
Testantur miracula.

5 a. Vita functis et gibbosis
Forma redit et leprosis
Cutis munda corporis;

5 b. Caecis visus, lingua mutis,
Claudis gressus, vis salutis
Cunctis adest inferis.

6 a. Pastor bone, pastor digne,
Pastor clemens et benigne
Nos tuere subditos.

6 b. O Eadmunde, nos emunda,
Tua sancta et fecunda
Prece duc ad superos.