122. De sancto Eligio.

1 a. Electam Eligium

Laudet hoc collegium,
Una vox ad ligium
Omnium pandatur ;

1b. Qui matris in gremium
Aquilae per nuntium
Magnus ad obsequium
Christi nuntiatur.

2 a. Lemovicas patria

Fuit huic, quem Gallia
Doctoris peritia
Fabrum fecit auri.

2 b. Mox regis in curia
Fabricat eximia
Prius ad obsequia
Custodis thesauri.

3 a. Cubans in cilicio
Didicit in somnio,
Sua quod afflictio
Deo fit accepta.

3 b, Ab eius nam pallio
Balsami perfusio
Fragrat, quae mysterio
Caput est adepta.

4 a. Hic se pro pauperibus
Spolians foeneribus,
Inhians operibus
Regibus fit gratus,

4 b. Horumque muneribus
Fabricatis domibus
Monachos reditibus
Ditat vir sacratus.

5 a. Tricentena contio
Virginum coenobio
Datur ab Eligio
Miris coruscante;

5 b. Adest nam praesidio
Suo monasterio,
Ne detur incendio
Flamma circumstante.

6 a. Erogando proprium
Vacuat marsupium,
Quod super hunc nescium
Replet actor lucis.

6 b. Cotilorum hic trium
Vino sitientium
Sitim sedat plurium
Signo facto crucis.

7 a. Miris tot extollitur,

Claudis gressus redditur,
Paralysis tollitur
Eius prece pura:

7 b. Vitae restituitur
Mortuus, atteritur
Daemon et eicitur
Praedixit futura.

8 a. Praefulgens Parisius
Sacer hic Eligius
Praesul est eximius,
Post Noviomensis.

8 b. Pudicas et sobrius,
Prudens, humilis, pius
Audoenus socius
Fit Rotomagensis.

9 a. Vivit aeternaliter
Exspirans carnaliter,
Scit, eius qui nequiter
Tumbam blasphemavit.

9 b. Oret ergo iugiter,
Et misericorditer
Nobis praeparet iter,
Morte qui nos lavit.