124. De sancto Eligio.

1. Sancti praesulis

Colentes haec sollemnia

2 a. Salvificet salus summa

2 b. Ac Dei protegat dextra.

3 a. Dei athleta,

3 b. Pro nobis ora;

4 a. Vitae nobis gaudia,

4 b. Eligi pater, impetra.

5 a. Praesul hic sanctus multa
praedicavit
instantia

5 b. Mundana devitare
et amplecti
caelestia.

6 a. Vitae nobis gaudia,

Eligi pater, impetra ;
deprecamur omnes una,

6 b. Deum nobis, pie, placa;
vitae nobis gaudia,

Eligi pater, impetra.

7 a. Pastor hic almus
multa virtute et
doctrina

7 b. Servorum Christi
sacra roboravit
pectora.

8 a. Plurima quidem
Eligius praesul
in plebe fecit miracula,

8 b. Per quae multorum
Deo adnuente
ad vitam convertit animas.

9 a. O felix praesul,
cui tot et tanta
Deus concessit
facere mirabilia !

9 b. Vere beatus,
cui angelorum
semper assistit
consolatio benigna !

10 a. Huius nos precibus,
salvator, conserva ;

10 b. Cum iudicaturus
veneris saecula,

11. Perennis vitae
da nobis gaudia
in caelorum gloria.