139. De ss. Felice et Adaucto.

1 a. Salutaris, veni caris,
Fletibus nostris amaris
Sis solamen unicum

1b. In hoc festo patronorum
Felicis, Adaucti, quorum
Est certamen Punicum.

2 a. Gloriemur mente sana,
Contemnentes saecli vana
Exsultando dulciter;

2 b. Imploremus prece prona,
Ut det nobis caeli dona
Et regnum feliciter.

3 a. Sacerdos Felix praecelse,
Adaucte, princeps excelse,
Qui sprevistis idola,

3 b. Mucrone ob hoc truncati,
Palma caeli trabeati,
Martyrum aureola.

4 a. Unionem sponsae Christi
Ecclesiae date tristi
Largiendo pneumata,

4 b. Navem Petri fixam stare,

Fauste possit triumphare,

Propellentes schismata.

5 a. Decorem ritus Romani
Sumant omnes fide sani
In regno Bohemiae;

5 b. Ultio procul divina
Fiat, si cessat ruina
Populi Moraviae.

6 a. Sacramento sit contentum
Ritu Romano, inventum
Omnis boni fundamentum
Moto sensu exiero,

6 b. Karitatem pacis ferre,
Unionis et non guerrae,
Decet quemvis huius terrae
Implorata supero.

7 a. Neuma dulce decantemus,
Iesum Christum collaudemus,
Larga voce personemus
Texentes Magnificat.

7 b. Alma virgo atque pia,
Tu nos fove, o Maria,
Partus namque tis nos quia
Sola spes vivificat.

8. Burgum istum defensate,
Patroni, interpellate,
Cives eius adiuvate,
Quorum fides militat.