140. In Inventione s. Foilani.

1 a. Quasi sol diluculo
Nostro vernat saeculo
Martyris inventio.

1 b. Quem frondosi tegminis
Umbra saeptum virginis
Detegit devotio.

2 a. Moram causans Foillani
Mittit quaerens de Germani
Responso solacium ;

2 b. Visionis hic supernae
Signo refert se fraternae
Mortis metu saucium.

3 a. Orans astat mensae Christi,
Per columbam discit tristi
Fratrem sterni vulnere;

3 b. Avis alba vitam mundam,
Rubens ala necis undam
Monet intellegere.

4 a. Constans in ieiunio
Gertrudis oratio
Dum fervet instantius,

4 b. Angelus hoc suggerit,
Quod martyr transierit
Ad regnum superius.

5 a. Ductu lucis praevio
Corporum congestio
Monstratur in invio ;

5 b. Defuncti diutius
Redolent suavius
Nardi stillicidio.

6 a. Serve Christi,
Nos a tristi
Casu serva,
Te caterva

Canat ista laetius.

6 b. Nos, qui sumus
Vapor, fumus,
Quorum finis
Vermis, cinis,

Surgamus in melius.

7 a. Virgo martyr caespite

Centeno fert plusculum,

Qui cum sceptro divite
Reliquit et saeculum,

Trinae messis inclitae
Referens manipulum.

7 b. Claritatis intimae
Lubrica privatio

Nos, Iesu piissime,
Ligat in exsilio ;

Redeat lux animae
Patris patrocinio.