141. In ss. Iuliani et Basilissae.

1. Insigne festum Iuliani martyris,

Quo cara stringens virginis consortia

Caelos adeptus fit supernus incola,

Plebis dicatae multitudo personet,

Fidesque plena singulorum nuntiet !

2. Hic Iulianus, sorte clari germinis

Civis togatae urbis Antiochiae,

Imbutus omni disciplina artium,

Illustre pignus unicum parentibus,

Vitam gerebat consecratam moribus.

3. Qui bis novenis annuis recursibus

Spem cum serendae prolis in se ostenderet,

Assunt parentes, ire nuptum suggerunt,

Quo liberorum casta procreatio

Avos perenni consecraret nomine.

4. Sed, ecce, Christi servus ad Deum fugit,

Septem diebus noctibusque pervigil,

Quid ipse dicat, quid velit, iam consulit;

Adest Deus docens fidelem servulum,

Iubens, salutis appetat conubium.

5. Firmatus idem gratiae oraculis

Surgit parenti laetior consentiens ;

Ex more virgo tunc puella quaeritur,

Mox Basilissa sorte huic desponditur,

Decus decori compar hic adiungitur.

6. Adest et ipse nuptiarum iam dies,

Urbis vocata multitudo convenit,

Plebes vicinae civitatum confluunt

Urbana laetae concinentes cantica,

Amore carnis perstrepentes cymbala.

7. Sparsis sonorum musicis concentibus

Melos per omnem civitatem personat,

Cantu sonora concrepabant organa,

Lyrae strepentes tinniebant chordulae,

Cavis plateae perstrepebant citharis.

8. Sed haec beatus gestiens contemnere

Mentem futurae praeparat victoriae;

Ac ipse victor tradita cum virgine

Intrat sacratum iam tori cubiculum,

Illic reclines contuentur mox Deum.

9. Sed prima virgo dona sentit munerum,

Quibus beato mox odoris nectare

Tori refusa iam sacrata horresceret;

Hinc fundamenta contremiscunt lectuli,

Et luce clara innovantur caelibes.

10. Fulgore postbinc praeeunte lampadum

Rex Christus illis luce clara ostenditur

Chori angelorum vel sacrarum virginum ;

Visu salutis intuentur cernui,

Iam tunc foventur, tunc docentur amplius.

11. Hoc sacrosancto provocati munere

Iunguntur ambo iunctione spiritus

Et carnis actum nescientes lubricum

Tenent beatum caelibes conubium,

Quo spiritales proferant partus Deo.

12. Punctis deinde protinus parentibus

Claro superstes liberorum nomine

Fundos domosque praediorum dividunt,

Quibus virorum virginumque fulgida

Dicanda Christo consecrant coenobia.

13. Sed palma florens Iuliani martyris

Decem virorum milibus praetenditur,

Idem paterno quos regebat ambitu.

Hinc et choreis Basilissa virginum

Stipata floret gratia charismatum.

14. Erat futuro martyri hoc proprium

Cum sacrosancta Basilissa coniuge,

Ut oris eius igne tactus quispiam

Statim supernam consecutus gratiam

Terrena linquens stringeret caelestia.

15. Sic, sic docentes plebium frequentiam,

Sic multa Christo consecrantes milia

Duae lucernae candelabro impositae

Lucent sereno claritatis lumine,

Fulgent perenni gratiarum lampade.

16, Hinc Basilissa commonente virgines

Columna lucis eminens apparuit

Stili beatam scriptionem praeferens,

Quae deputatam virginum frequentiam

Deo placentem praedicaret fulgidam.

17. Sui precatus virgo vota obtinens

Praemittit omnes iam locandas virgines

Caelestis aulae in beato sidere,

Quas ipsa claro fine mortis assequens

Orationi incubans defungitur.