148. De sancto Germano.

1 a. Germinabit germen iustum,
Germen vernans et venustum
Flos Antissiodori,

1 b. Ros Germanus, florens vita,
Christo vivens legiscita
Mente tenens memori.

2 a. Christi legem propagavit,
Verbo vitae plebem pavit
Fidem probans opere.

2 b. Verbis docet, probat operibus,
Factus praesul praecellit mori,
bus
Sacro fretus munere.

3 a. O quam felix, quam praeclarus
Praesul iste Christo carus,
Praesul carens crimine,

3 b. Praesul absque macula,
Qui mundavit saecula
Ab errorum semine.

4 a. Hic ad Anglos transmeavit
Et errantes revocavit
Ab erroris scelere ;

4 b. Genofevam informavit,
Artis novae subarrhavit
Insignitam foedere.

5 a. Clausus tumba Cassianus
Vocem solvit, cum Germanus
Praemisit eloquium:

5 b. "Hic quiesco inquiens
"Et exspecto gestiens
Venturum iudicium.

6 a. Vitam nimis artam ducens,
Fide, vita, signis lucens,
Panem hordeaceum

6 b. Manu formans propria
Sumpsit in laetitia,

Potum subdens aqueum.

7 a. Sal, legumen, carnes, vinum,
Pisces, potum sicerinum
Non gustavit, cilicinum
Semper saccum induens,

7 b. Inter trabes accumbebat,
Lecto caput excludebat,
Nam mensuram excedebat
Lecti cervix defluens.

8 a. Morbos sanat victor mortis,
Vitam reddit iam absorptis,
Tandem carnis solvens legem
In decore videt regem
Revelata facie.

8 b. Huius festum veneremur,
Hunc devote deprecemur,
Eius prece reformemur,
Ut in dextris gloriemur
Post spem frui specie.