161. De sancto Hildevardo.

1 a. Hodiernae lux diei
Hildewardi, viri Dei,
Reducit sollemnia.

1 b. Hac in die sanctus Dei
Basis exsistens fidei
Petiit caelestia.

2 a. Iste natus in Tulia
De praeclara prosapia
Cunctos cives superat

2 b. Castitate, pietate,
Largitate, bonitate,
Quibus cunctis praeerat.

3 a. Vacat sedes, praesentatur
Daugoberto, sublimatur
In praesulis solio ;

3 b. Comes, qui hunc postponebat
Et qui natum promovebat,
Demens fit cum filio.

4 a. Iste, quem Deus elegit,
Flumen sicco pede legit
Comitante nemine.

4 b. Horas solus dum canebat,
Angelus huic respondebat
Missus caeli culmine.

5 a. Psallat chorus Tenremundae,
Alte canat et profunde
In sancti memoria.

5 b. Psallant omnes et precentur,
Ut in caelis collocentur
Hyldewardi gratia.