176. De s. Iohanne Evangelista.

1 a. Vertex evangelicus

Est, quem rector caelicus
Diligit prae ceteris ;

1 b. Hic abstractus nuptiis
Et intactus vitiis

Fontem bibit aetheris.

2 a. Christi mortem aspicit,
Curam matris suscipit
Fervens vincit oleum:

2 b. Haustum virus hebetat,
Mortuos revegetat,
Silicem dat gemmeum.

3 a. Aurum dat ex virgulis,
Caeli Pathmos insulis
Aspicit mysteria.

3 b. Latro per hunc resipit
Et purgatus recipit
Christi ministeria.

4 a. Vocat cum apostolis
Et caelorum incolis

Hunc de carne Dominus.

4 b. Mors morsu non tetigit
Ipsum, per quam attigit
Christi vultum comminus.

5 a. Vates et apostole,
Martyr, virgo, recole
Vota te colentium

5 b. Aquilinis protegens
Alis nos et subvehens
Ad terram viventium.