177. De s. Iohanne ante Portam Latinam.

1. Eia, carissimi,
agamus cum gaudio
Iohannis sollemnia,

2 a. Quem Dominus posuit,
Quoniam sic voluit,
In tanta munditia,

2 b. Ut servaret virginem
Illum sanctum hominem
Gratuita gratia ;

3 a. Et post apostolicum
Fecit duodecimum
Divina clementia,

3 b. Cum patrem deseruit
Et ea, quae habuit,
Dereliquit omnia.

4 a. Felici commercio
Pro minuto pretio
Dimittens terrestria
Recepit caelestia.

4 b. In Domini gremio
Dormivit cum gaudia
In cena dominica
Fide fretus deica.

5 a. Cum per crucem
Mortis ducem
Superaret
Et damnaret

Rex noster et gloria,

5 b. Vocans fratrem
Sibi matrem
Commendavit,
Quam amavit

Vere super omnia.

6 a. Ex hac die
Pius pie
Custodivit
Et servivit

Sine qua iniuria,

6 b. Donec vita
Stabilita
Sibi fuit,
Et placuit

Deo dare praemia.

7 a. Propter fidem trinitatis
Et amorem deitatis
Exsulatus a patria
Pulsus et cum iniuria.

7 b. Ubi vacans Deo soli,
Raptus ad superna poli
Novit Dei mysteria,
Quae fiunt in ecclesia.

8 a. O Iohannes, Deo care,
A peccatis declinare
In hac vita
Fac nos ita,

Mereamur ut praemia,

8 b. Ut per opus pietatis
Cum augmento caritatis
Simus cuncti
Deo iuncti

In caelesti patria.

9. Ut haec fiant omnia,
Donet Dei gratia.