173. In sancti Thomae.

Ad Vesperas.

1. Festum, Christe rex, per orbem

illuxit almificum,

In quo tibi confitetur

cuncta chors fidelium,

Gloriae persolvit hymnum

pro triumphis martyrum.

2. Gloriosus, ecce, tuas-

que Thomas discipulus,

Cicatrices contrectando

creditus es Dominus,

Inter fratres gloriosus

exstitit apostolus.

3. Nuntius venit de Indos

quaerere artificem

Architectum, construere

regium palatium;

In foro deambulabat

cunctorum venalium.

4. "Habeo servum fidelem,"

locutus est Dominus,

"Ut exquiris, talem, aptum

esse hunc artificem."

Abbanes videns et gaudens

suscipit apostolum.

5. Traditur regis ministro

sanctus Dei apostolus ;

Elioforum ingressus

susceptus convivio,

Digna suo percussori

reddita est ultio.

6. Rex, ut vidit et audivit

insigne miraculum,

Iuvenes ut benedicat,

supplicanter postulat,

Sic baptisma candidatos

consecrat velamine.

7. Gundaforus, rex Indorum

iniquus ac perfidus,

Romanorum more sibi

voluit palatium,

Huius opus construere

praecipit apostolum.

8. Sed beatus atque sanctus

Didymus apostolus

Erogando regis aurum

construit aediculum

Rutilum, coruscum gemmis,

in supernis sedibus.

9. Carcere mox rex Abbanem

trusit cum apostolo ;

Gat, infirmus regis frater

migrat ab hoc saeculo,

Caelo ductus vidit dignum

fratrisque palatium.

10. Angeli expetunt Christo,

ut resurgat mortuus,

Gundaforo reddat aurum,

emat aedificium

Et resolvat vinculatum

Domini discipulum.

11. Ilico surgens exponit

sacram regi ordinem,

Carcerem deinde petit,

elicit apostolum,

Obsecrant undique fratres

veniamque criminum.

12. Tunc Thomas in campum vocat

populos Indanicos,

Lapidem conscendit altum,

corda mulcet gentium,

Per baptisma pollicetur

veniam peccaminum.

13. Indiam superiorem

visitans aggreditur,

Dogma Christi praedicando

fundavit ecclesiam,

Infinita per baptisma

consecravit milia.

14. Mira quippe ac stupenda

faciens miracula

Sinticemque restauravit

corporali lumine,

Laticis perfundit unda

illam et Mindoniam

15. Christiana iam probata

regis uxor Treptia

Regnum Christi concupiscens

respuit terrestria ;

Ulcerosus scabrescens

ut sanetur, postulat.

16. Precibus Thomae a Christo

angelus dirigitur,

Exuit in parte totam

ulcerosam tunicam,

Novae cutis indumenta

vestivit corporea.

17. Templum solis comminutum

corruit cum idolo,

Ac metallum pretiosum

solvitur in pulverem,

Rex illius civitatis

fugit cum Carisio.

18. Tunc sacerdos idolorum

furibundus astitit,

Gladio transverberavit

sanctum Christi martyrem ;

Glorioso passionis

laureatur sanguine.

19. O beata inter omnes

Edessena civitas,

Quae pignus suscepit almum

Domini discipulum,

Ubi corpus requiescit

cum honore conditum.

20. Inde cuncti te precamur,

summi patris filium,

Mitte nobis de supernis

invictum auxilium,

Ut credentes evadamus

aeternum supplicium;

21. Ut sub uno cuncta cohors

coniuncta fidelium

Te sequamur, te canamus,

te fruamur perpetim,

Humili professione

proclamemus gloriam.