192. De sancta Katharina.

1 a. Ad palmam huius virginis,
Tam gloriosi nominis,

1 b. Psallat chorus fidelium
Petens huius subsidium.

2 a. Haec castitatis lilium,
Facta consors caelestium,

2 b. Regali stirpe genita,
Nobilior per merita,

3 a. In cuius pueritia
Litterali peritia

3 b. Est erudita primitus
Doctrina sancti spiritus.

4 a. Quinquaginta doctoribus
Cum ea disputantibus

4 b. Vitae proponit pabulum
Docens spernendum saccu-
lum.

5 a. In Christi stat certamine
Pro eius passa nomine,

5 b. Palmam triumphi obtinet,
Vitam aeternam possidet.

6 a. Corpus ministri lacerant,
Quod movere non poterant,

6 b. In carne facto vulnere
Non cessat laudes canere.

7 a. Poenas lictoris respuit,
Dum arma Christi induit
Parata vitam reddere,
Qui venit hanc redimere.

7 b. Fiunt rotae cum studio,
Instat virginis passio,
Ministri regis saeviunt,
Tormentis hanc iniciunt.

8 a. Ad laudem huius virginis
Ictu caeduntur fulminis,

8 b. Circumstantes sunt stupidi,
Conversi multi perfidi.

9 a. Regis uxor compungitur,
Dum Katherina caeditur,

9 b. Eius anteit passio

Caelesti digna praemio.

10 a. Vellunt mammas de pectore
Afflicto diu corpore ;

10 b. Demum mucrone caeditur,
Spiritus Deo redditur.

11a. Ad Katherinae transitum
Duplex est signum proditum,

11b. Lac emanat pro sanguine
In altum rapta virgine.

12 a. In cuius natalitio

Nostra petat devotio,

12 b. Ut eius interventio

Nos solvat a contagio.