194. De sancta Katharina.

la. Virginis obsequio
Katharinae gaudio
Psallat tota contio
Clericorum ;

1 b. Cordium devotio
Fragret Dei filio,
Deleatur livio
Peccatorum.

2 a. Ave, virgo regia,
Costi regis filia,
Cuius pollet gratia
Sanctitate.

2 b. Cui foetent daemonia,
Sordet idolatria,
Fulget in ecclesia
Claritate.

3 a. Ave, plena copiae
Sensus et audaciae,
Qua floruit sophiae
Disciplina ;

3 b. Lux illuxit gratiae
Per te, victrix, hodie,
Per te digna veniae
Fit regina.

4 a. Ave, splendor fidei,
Non cedens rabiei
Tortorum neque Dei
Linquens legem ;

4 b. Firmatrix nostrae spei
Sis coram nato Dei
Reconcilians ei
Suum gregem.

5 a. O vas flagrans odore,
Cuius fuso cruore
Mons Sinai corpore
Decoratur.

5 b. Dei dignos amore

Nos fac, caelestis orae
Quod cohors haec odore
Perfruatur.