195. De sancta Katharina.

1 a. O beata Katharina,

O praeclara laude digna,
Quae meremur,
Ne damnemur,
Repelle supplicia.

1 b. Fonti summae pietatis,
Qui nos lavit a peccatis,
Nos, benigna,
Prece digna

Clementer concilia.

2 a. Monte Sina corpus latum
Rorem stillat aegris gratum,
Quo multarum sanitatum
Dantur beneficia.

2 b. Rosa Christi praeelecta,
Rosa decens et perfecta,
Passionis falce secta,
Fac nos dignos venia.

3 a. Salve, salve, vas pudoris,
Vas caelestis plenum roris,
Mundum intus, clarum foris,
Nobile per omnia.

3 b. Fac nos sequi sanctitatem,
Fac per mentis puritatem
Contemplari trinitatem
Unam in substantia.