199. De sancta Katharina.

1 a. Diem festum celebremus,

Regem magnum adoremus,

Imperantem regibus ;

1 b. Veneremur et reginam,

Quae suscepit Katherinam

Cum suis virginibus.

2 a. Orta tribu de regali

Flore vernat virginali

Martyr, quae nunc immortali

Praemiatur gaudio.

2 b. Sensu, fide praemunita,

Forma vultus insignita

Et ad plenum erudita

Literarum studio.

3 a. Haec pro lege Dei certat,

Sed conatur, ut subvertat

Caesar mentem virginis ;

3 b. Videns stupet et miratur

Et stupore conturbatur

Mirae pulchritudinis.

4 a. Ad culturam idolorum

Movetur christicola ;

Flecti nequit, sed deorum

Detestatur idola.

4 b. Caesar instat blandimentis,

Minis, prece, pretio ;

Virgo multis argumentis

Resistit Maxentio.

5 a. Quinquaginta peritorum

Convocatur contio,

Sed confortat angelorum

Hanc invictam visio.

5 b. Hos aggressa confidenter

A primate incipit,

Qui consultus insolenter

Coram sancta desipit.

6 a. Victos iubet rex comburi ;

Tunc periti perituri

Postulantes veniam

6 b. Fidem sanctae confitentur

Trinitatis nec verentur

Caesaris insaniam.

7 a. Stupefactus ad eventum

Praesentis miraculi

Valde timet detrimentum

Sui Caesar populi.

7 b. Christi saevit in ancillam

Crebro caesam verbere,

Post flagella iubet illam

Taetro claudi carcere.

8 a. Visitatur a regina

Sponsa Christi Katherina

Noctis sub silentio,

8 b. Et custode separato

A se procul praeoptato

Fruuntur colloquio.

9 a. Clam ingressa, clara recedens

Militumque princeps credens

Soli Christo militant ;

9 b. Ab errore revocantur

Et a Christo visitantur,

Cuius sponsam visitant.

10 a. Eductam de carcere

Rex miratur vivere,

Qui cibum negaverat ;

10 b. Virgo stat intrepida,

Cui columba candida

Victum ministraverat.

11a. Capitalem

subit sententiam,

Virginalem

lac pudicitiam

Designans emanavit.

11b. Ab angelis

in monte Sinai

Fertur, in quo

legem Adonai

Moysi propalavit.

12 a. Aegros reddit sospitati,

Sunt nonnulli liberati

Ab inimici laqueo

Sacro peruncti oleo,

Quod de sepulcro manat.

12 b. Sponsa Christi, nos exaudi

Assistentes tuae laudi,

Per te det nobis veniam,

Qui confert iustis gratiam,

Corde contritos sanat.