202. De sancto Kiliano et sociis.

1. Pari concentu
trium martyrum

2 a. Kiliani,
Colonati
et Totnani rata
veneremur sollemnia

2 b. Atque piis
laudibus
eorum altisona
modulemur praeconia.

3 a. Qui aversantes terrea,
mundi frivola,
cuncta huius callis ludicra,

3 b. Sequendo Christi monita
iustis. promissa
adepti sunt poli praemia.

4 a. Illius zelo flagrantes
ensi tyrannico
submiserunt colla

4 b. Et fusa cruoris unda
celsa conscenderunt
caeli palatia.

5 a. Ubi sanctorum turba
triumphat purpurata
in veste candidula;

5 b. Angelorum milia
concrepant ovantia
praedulci melodia.

6 a. Ergo ipsorum
iam voce consona

6 b. Crebris precibus
pulsemus veniam,

7 a. Ut reatus

nostri contagia
per horum gloriosa
solvantur merita.

7 b. Nostra quoque
dignentur nomina
perenniter conscribi
in caelesti aula,

8. In qua cum eisdem
semper canamus
regi aeterno gloriam.