195. In Profectione Exercitus.

1. O verum regimen, Christe, fidelium,

Qui vita, via es ac pia veritas,

Lustrans conspicuo lumine credulos,

Obscurans quoque perfidos.

2. Tu es unigena alma redemptio,

Tu verus genitor nosque clientuli,

Tantis [dum] lacrimis pectora tundimus,

Intende pie supplices.

3. Rectores, humiles quaesumus, patriae

Cum cunctis sibimet plebibus creditis

Directo itinere, inclite, ducito

Dans pacis bona omnibus.

i. Moysi qui famulo ad precem intuens,

Ponti purpurea aequora dividens

Traducis cuneos Israeliticos

Siccato maris alveo,

5. Et qui ad nihilum principis illius

Pharaonis opus calle potissimo

Calcando rediens impium ilico

Mergis limpha superfluens,

6. Eius quique pius quaestibus annuens,

Frendens praevalide mox truculentior

Divinis Amalec plectitur ictibus

Consumptis suis omnibus:

7. Dux esto placidus his tuis servulis,

Virtus angelica illis adhaereat,

Custos invigilet his tua gloria,

Qui es summa benignitas.

8. Ut tamquam vituli plebs tua commeans

Ex grege fidei ausibus liberis

Gentes barbaricas cornibus ventilet

Ac planta terat impios.

9. Hostiles ades telaque bellica,

Quae frustra minitat turba satellitum

In necem populi tendere acrius,

Everte, Deus, funditus.

10. Cuius praesidio. inclitus belliger

David opilio mente tyrannidem

Goliam subigens saxeo impetu

Laetus munere redditur.

11. Post hunc qui etiam tempore postero

ludam munificum efficis praelio,

Clemens salvifica castra fidelium

Depellens cito taedium.

12. Nostrorum gemitus aspice principum

Vulgi funerea munera contuens

Et iusto iugulo deseca aemulos,

Tu regum pater omnium.

13. Non nostris noceat pugio finibus,

Sed firmes animo principes inolitos,

In cunctis vigeant robore gratiae

Facti undique compotes.

14. Defende populum vindice dextera,

Qui sacro pretio sanguinis emptus est,

Ac vero lavacri gurgite abluens

Tot sacra tibi milites.

15. Victricem tribue, Christe, de hostibus

Palmam christicolis caelitus regibus

Ex totis viribus te redamantibus

Voto, vita et actibus.

16. Nunc coepta peragant gressibus prosperis,

Cum pace redeant sedibus propriis

Partumque recinant hymnum in aetheris

Huiusce tibi vocibus.

17. Sit trino Domino gloria unico,

Regnum perpetuum, aucta perennitas,

Qui semper famulis comta corona es,

Regnans saeculis omnibus.