206. De sancto Lazaro.

1 a. Inter mira salvatoris
Signa et prodigia

1 b. Lazari atque sororis
Salus est egregia.

2 a. Hac in carne, hac in mente
Per Messiam resurgente
Suscitantur pectora,

2 b. Ut ad laudem conditoris
Et ad vitae sanctioris
Consurgamus opera.

3 a. A benigno salvatore
Suscitandus a sopore
Est dilectus Lazarus,

3 b. Qui transmigrans Gallilaeam
Invitatur ad Iudaeam
A sanctis sororibus.

4 a. Quo audito illic mansit,

Sed ad illas post haec transit
Lazarum se diligentem
Excitare dormientem:

4 b. Etsi dormit, salvus erit,
Etenim somnum re quaerit;
Sed, a Iesu dum aditur,
Iam defunctus invenitur.

5 a. Hinc, Maria dum adorat
Et utraque soror plorat
Turbae cum frequentia,

5 b. Fremit Iesus et turbatur
Atque coram lacrimatur
Et amoris gratia.

6 a. Inde lapis tollitur,
Mortuus egreditur,
Ligatus absolvitur
Christi ad imperia.

6 b. In spem paenitentium
A sorde foctentium
Unus discumbentium
It Iesus ad prandia.

7 a. Per hunc multi crediderunt
Et credendo reviserunt,
Ceterique convenerunt,
Ut viderent Lazarum.

7 b. Propter signum hoc prae-
clarum
Turbae Israelitarum
Acceptis ramis palmarum
Exceperunt Dominum.

8 a. At scribae et pharisaei,
Sacerdotes et Iudaei
Cogitarunt sanctum Dei
Trucidare Lazarum.

8b. Sed tu, factor protoplasti,
Quae non erant, qui plasmasti,
Posses hunc, quem suscitasti,
Suscitare iterum.

9 a. Per hunc nos nunc, pastor bone,
Prima resurrectione
De intus vivifica

9 b. Et secunda post utrumque
Corpus nostrum spirit umque
Superne glorifica.