215. In Translatione s. Maglorii.

1 a. Ad honorem

patris Maglorii
Spiritales

exsultent filii ;

1 b. Sub pastoris

sacri praesentia
Gregem sacra
decet laetitia.

2 a. Primo Dei gratia

Translatum de Sargia
Recepit Britannia

Corpus sacratissimum.

2 b. Sub accessu litoris
Tactu sacri corporis
Pars mutatur arboris
In saporem optimum.

3 a. Claudus salit et laetatur,
Adulescens suscitatur
Custos monasterii.

3 b. Ad regna siderea
Scala patet aurea
Meritis Maglorii.

4 a. Votis illuc conscendamus,
Conscendentes gaudeamus
Et gaudentes erumpamus
In laudum praeconia.

4 b. Si quis votum vovit rectum,
Voto dabit hic effectum,
Qui vas Dei praeelectum
Fuit ab infantia.

5 a. Vas insigne, vas honoris,
Incorrupti flos odoris,
Honestatis ac pudoris
Formam praebet saeculo.

5 b. Virginali vernans flore
Caelos replet hic odore,
Regem cernens in decore
Mundi cordis oculo.

6 a. O Maglori, voto pari
Te studemus venerari,
Dum versamur in hoc mari,
Tua nobis suffragari
Dignetur clementia.

6 b. Circa gregem spiritalem
Curam gere pastoralem,
Nos ad terram pascualem
Tu per viam duc regalem
Sub Christi custodia.