220. De sancta Margareta.

la. Urbs beata, Sion, gaude
Pio voto, iugi laude
Pia colens gaudia ;

1 b. Celebretur dies laeta,
Virgo vicit Margareta
Triumphali gloria.

2 a. Quae gentili stirpe nata.
Fide Christo foederata
Sponsi nitit annulo ;

2 b. Iuvenili vernans aevo

Dolum nescit, caret naevo
Crucis clara titulo.

3 a. Oves pascit, oves feta,
De gemello foetu laeta,
Rosam nectit lilio.

3 b. Quam de grege praedoraptam
Velut agnam aris aptam
Praesentat Olybrio.

4 a. Adamatur, sed amentem
Sic amantis spernit mentem,
Ridet tribunalia.

4 b. Blandimentis non seducta
Minas spernit, stat in lucta,
Christi fert dextralia.

5 a. Furit praeses, datus irae,
In obscurum iubet ire
Lucernam iustitiae;

5 b. Nocte saepta carcerali
Luce nitet virginali
Margarita gloriae.

6 a. Satan prodit ad conflictum,
Quem substernit virgo victum
Per crucis praesidium.

6 b. Genus prodit requisitus,
Dolos nudat, sed invitus,
Implorat effugium.

7 a. Fugam captat, loco cedit ;
Ad tribunal virgo redit
Educta de carcere.

7 b. Idolorum spernit cultum,
Nec tyranni trucem vultum
Veretur offendere.

8 a. Flammis data velut aurum
Enitescit, cepit laurum,
Omni caret scoria.

8 b. Ignem vincit, aquis datur,
Sed nec aquis suffocatur ;
Utrimque victoria.

9 a. Hanc de caelo vox confortat,
Dum columba laurum portat,
Triumphales titulos ;

9 b. Unde gaudens et devota
Deo precum reddit vota,
Labiorum vitulos.

10 a. Ferro demum neci data
Caelos petit laureata
Corona iustitiae.

10 b. Regi regum sit laus digna,
Cui, virgo, nos consigna
Cum colonis gloriae.