221. De sancta Margareta.

1 a. Iubilemus Christo melos,
Margaretam qui ad caelos
Vexit post victoriam.

1b. Pax et salus nuntiantur
His, qui eius venerantur
Condigne memoriam.

2 a. Virgo paret quem beata,
Huic est haec consignata
Ante saecli tempora.

2 b. Verbum patris hanc ornavit,
Quando hic magnificavit
Et in caeli curia.

3 a. Res est mira, res insignis,
Torret sacros artus ignis
Nec mentem attenuat.

3 b. Caeli fusa virgo rore
Tanto gaudens in dolore
Christum regem invocat.

4 a. Radix pater vitiata,
Proles virgo Deo grata,
Margarita inclita;

4 b. De radice tam spinosa
Paradisi prodit rosa
Florens, rubens, candida.

5 a. Mira floris pulchritudo,
Quam honestat magnitudo
Septiformis gratiae.

5 b. Collaetemur huic flori,
De quo gaudent omnes chori
Virginalis gloriae.

6 a. Iesu pie, splendor patris,
Margaretae nos beatis
Iunge prece sedula ;

6 b. Flos et fructus puellaris
Et corona virginalis,
Tibi laus per saecula.