223. De sancta Margareta.

1 a. O beatae Margaretae
Virginis sollemnia,

1 b. De palma cuius athletae
Laetatur ecclesia.

2 a. Haec gentili patriarcha
Nata Theodosio

2b. Digna sacri flatus arca
Petitur Olybrio.

3 a. Cuius spernens minas, preces
Carcere recluditur;

3 b. Hinc non pavens miles neces
Flagris, virgis caeditur.

4 a. Sed, quia nec sic oboedit,
Laceratur pectine ;

4b. Nudis costis hinc procedit
Rivus rubens sanguine.

5 a. Post haec Ursus
Frendens rursus

Carceris in tenebras
Sanctam trudit,
Hanc illudit

In dracone satanas.

5 b. Quem vi crucis
Scindens trucis

Denudat insidias,
Cuius versa
Fraude mersa

Lymphis vicit balneas.

6 a. Ergo circumstantis gentis
Credunt quina milia,

6 b. Decollata qui pro Christo
Capiunt caelestia.

7 a. His astantem iunge plebem,
Ut per transitoria

7 b. In perenni mereamur
Exsultare gloria.