224. De sancta Margareta.

1 a. Titulus memoriae
Celebretur hodie
Martyris eximiae,
Margaretae ;

1 b. Fermentum malitiae
Cesset et nequitiae,
Et ipsius gloriae
Congaudete.

2 a. Hanc fidei firmitas,
Hanc spei soliditas,
Hanc sincera caritas
Decoravit ;

2 b. Virginalis castitas
Morumque sinceritas
(Atque mentis firmitas]
Hanc ornavit.

3 a. Haec sanguinem proprium
Propter Dei filium
Fudit et Olybrium
Mente sprevit ;

3 b. Haec periclitantium,
In partu praegnantium
Adesse praesidium
Consuevit.

4 a. O mater eximia,
Cuncta pelle noxia
Contra nos pugnantia,
Virgo pura ;

4 b. Per tua suffragia
Detur nobis gratia
Et in caelo gloria
Permansura.

5 a. Margarita diceris,
Margaritis ceteris
Virtute praeponeris,
Virgo digna ;

5 b. Iam sponsum amplecteris,
Iam Christo coniungeris,
Nos Deo, quo frueris,
Reconsigna.