236. De sancto Martino.

la. Nostri patris et pastoris
Ad honorem sonet oris
Et cordis melodia,

1b. Qui carnalis expers molis
Vultum videt veri solis,
Sol alter in patria.

2 a. Pater pie, filiorum
Miserere depressorum
Adhuc carnis sarcina.

2 b. Nam invasit lupus gregem ;
Gregis pastor, lupi legem
A nobis elimina.

3 a. Sacro fonte nondum lotus
Caritate fervens totus,
Quod probas in pallio,

3 b. Gregem sacro fonte lotum
Fac ferventem, fac devotum
In tuo servitio.

4 a. Trinae cultor trinitatis,
Lepram sanans, sanitatis
Munus gregi tribue,

4 b. Ne grex lepra sit pollutus
Peccatorum vel imbutus,
Lepram mentis dilue.

5 a. Suscitator mortuorum,
Nos de morte vitiorum
Vitae reconcilia,

5 b. Ut te duce sic regamur,
Quod post mortem perfruamur
Immortali gloria.