243. De sancto Mauritio.

1 a. Pretiosa mors sanctorum
In conspectu Domini

1 b. Martyrum est Thebaeorum
Et laus suo nomini ;

2 a. Qui tot simul coronavit
Corona martyrii

2 b. Et ad caelos sublimavit
De terra exsilii.

3 a. Hi Thebaei, servi Dei,
Nullius criminis rei
Moriuntur,
Nunc sequuntur

Agnum sine macula ;

3 b. Qui viventes inter gentes,
Quae Caesaris sunt, reddentes
Et, quae Dei,
Reddunt ei,

Regnabunt in saecula.

4 a. Quorum vita gloriosa,

Quorum mors est speciosa,
Quorum passio beata,
Quibus morte vita data;

4 b. Quorum virtus admiranda,
Quorum fides adoranda,
Quorum vota consecrata
In caelis sunt collocata.

5 a. Qui, dum Caesaris proelia
Sequerentur in Gallia,
Iussi sunt sacrificia
Offerre et daemonia
Adorare crudelia.

5 b. O mira patientia
In eis et potentia !
Spectantes ad caelestia
Despiciunt terrestria,
Spernunt praecepta regia.

6 a. Et respondens Mauritius,
Qui erat primicerius,
Dixit regis militibus:

6 b. Sciat Caesar egregius
Nos esse servos illius,
Qui virginis est filius.

7 a. Tunc Caesaris insania
Saeva dictat imperia
Atque mori sanctos iussa
[Dat] post Christi vestigia.

7 b. Quos tota caeli curia
Accepit cum laetitia
Et duxerunt ad superna
Caelorum [hos] palatia.

8. Hi pro nobis intercedant,
Et Christo sit gloria,
Qui regnat in saecula.