246. De s. Maximo Regiensi.

1 a. Plaude, felix et inclita
Virgo, mater ecclesia,

1 b. Christo sponso dulcisona
Laudum depromens carmina,

2 a. Qui martyrum purpurea
Te coronat victoria

2 b. Et illustrat perspicua
Confessorum per lumina.

3 a. Inter quos fulsit caelica
Praesul Maximus gratia,

3 b. Festa cuius insignia
Solaris reddit orbita.

4 a. Hic ortus ut lux aurea
Mundi contempsit florida,

4 b. Apprime philosophica
Hausit fluenta trifida.

5 a. Post mundi linquens omnia
Iuga subit monastica ;

5 b. Ob vitae sibi merita
Praesulis datur infula.

6 a. O summi regis gratia,
O sancti viri gloria !

6 b. Redduntur caecis lumina
Aegrotis et remedia.

7 a. Ad eius precem mortua
Vitam resumunt corpora ;

7 b. Nam sua libens munia
Acceptat Christi gratia.

8 a. Stat miles ad certamina,
Zabuli frangit spicula,

8 b. In cuius mente placida
Virtutum fragrant balsama.

9 a. Signo crucis navicula
Disparuit phantastica.

9 b. Sed quis eius magnifica
Cuncta dicat miracula?

10 a. Ad tanti patris studia

Pullulat plebs monastica,

10 b. Et sub Christi militia
Castra florent insignia

11a. Ut Iacob tabernacula
Et Israel tentoria,

11b. Ut cedrorum plantaria
Fluenta prope limpida.

12 a. Post signorum magnalia
Et virtutum insignia

12 b. Carnis deponens onera

Sanctus conscendit aethera,

13 a. Ubi gaudet mirifica
Creatoris praesentia

13 b. In angelorum curia
Per festa immortalia.

14 a. Audi, pater, humillima
Filiorum praeconia;

14 b. Tua dulcis custodia

Nobis assit per omnia.

15 a. Fac, ut praesens familia
Inter sanctorum milia,

15 b. Qua frueris, perpetua
Tripudiet in gloria

16. Et caelesti symphonia
Deum laudet per saecula.