252. De s. Nicasio et sociis.

1, Ecce, pulchra

2 a. Canorum resultet
voce Alleluia,

2 b. Intimans requiem
sanctorum inclitam.

3 a. Felix stat nimium
angelorum rutilans
caterva.

3 b. "Sancte, sancte, sancte
Deus laude proclamat
aeterna.

4 a. Sedibus ter quaternis
apostolorum sedet
contio fulgida,
tribus et linguas iudicatura.

4 b. Martyrum inde sacra
legio coronata
caelesti praeminet
clarissimum decus in curia.

5 a. Hi sunt milites,
qui mundi
superarunt regna

5 b. Atque mitia -
fecerunt
immitium corda.

6 a. Honorum serta

dantur sanctis digna,
Qui vel prudentes
perpetrarunt iusta,
vel fide constantes
spreverunt tormenta ;
Ergo habent
caelestia regna,

6 b. Ubi perenni

triumphant gloria
Atque dulcia
depromunt cantica
arte laudiflua,
voce dulciflua,
Regi Christo
submittentes colla.

7 a. Multum recitaris
laude caelestium
atque frequentans
in choro virginum,
Alleluia,
dulcimode
te decantant
martyrum agmina

7 b. Laus tibi sit semper,
Christe, per omnia,
qui caelesti sanctos
canentes cithara
foves luce
tui mira;
unde tibi
proclamemus una:

8 a. Da nobis aeterna
caeli gaudia.

8 b. Ubi cantemus omnes
Alleluia.