264. De ss. Patronis Hildensemensibus.

1 a. Laudes Deo concinamus,
Patronorum attollamus
Praeclara magnalia.

1 b. Domus huius advocatos
Sacra nobis sorte datos
Laudemus cum gloria.

2 a. Summum patrem atque natum,
Utriusque sacrum flatum
Voce, voto supplici

2 b. Unum trinum veneramur,
Quo plasmamur et salvamur
Gratia praenobili.

3 a. Omnis Alpha et O boni,
Nostrae tu devotioni
Fervidus irradia.

3 b. Quidquid sapit atque spirat,

Tibi psallat, benedicat,

O maiestas inclita.

4 a. Auge fidem, caritatem,

Spem largire, da virtutem,
Vita, decus omnium.

4b. O crux sancta, veneranda,
Nos consigna, salva, sana,
Terens mundi pretium ;

5 a. Purpurataque gemmata,
Unda Christi venustata
Sacro fusa corpore,

5 b. Carnem, mundum triumphare
Satanamque superare
Da potenti numine.

6 a. Praeelecta O Maria,
Virgo pia, nos in via
Guberna, christifera.

6 b. Aufer culpas, morbos tolle,
Rege mores et extolle
Supra caeli sidera.

7 a. Omnis coetus angelorum,
Assistentes saeculorum
Regi aeternaliter,

7 b. Propulsantes inimicos,
Exhibete vos amicos
Nobis temporaliter.

8 a. Iam insignes vos, Bernwarde,
Ac sodales, Godeharde,
Epiphani, praesules,

8 b. Impetrate sanctitatem,
Pacem, terris ubertatem,
Obsecramus supplices.

9 a. Nobis, omnes sancti Dei,
Vates atque apostoli,
Confessores, martyres,

9 b. Vosque, flores virginales,
Mansiones aeternales
Praeparate caelibes.