268. De sancto Petro.

1 a. Pasce, Petre, oves Christi,
Quas in cura suscepisti,
Nam a Christo didicisti,
Quod sis pastor ovium.

1 b. Tu es petra fundamenti,
Tu columna firmamenti,
Firma robur nostrae menti
Tuum per subsidium.

2 a. Claves caeli, Petre, geris,
Regnum Christi promereris,
Dum de Christo confiteris,
Quod sit Dei filius.

2 b. Plenitudo potestatum

Tibi datur, et est ratum,
Quidquid ligas, est ligatum
Dei vinclo firmius.

3 a. Quidquid solvis, est solutum,
Quod tueris, hoc est tutum
Ad unius Dei nutum
Firmans moderamina.

3 b. Ergo nostri miserere
Et ope iuva sincere,
Solve vincla et tuere
Sempiterna saecula.