273. De ss. Petro et Paulo.

1 a. Isti duae sunt olivae,

Quorum chorus hic festive
Recolit sollemnia ;

1 b. Pascunt, ardent et medentur,
Mentes pascunt, ne graventur
Doctrinae penuria.

2 a. Ardent igne caritatis

Et medentur praegravatis
Qualibet molestia ;

2 b. Possunt vivos morti dare,

Morti datos suscitare

Freti Dei gratia.

3 a. Antiochus Petro sedem

Primam dedit, Remus aedem
Dignam reverentia.

3 b. Christum Petrus ut sequatur,
Crucem suffert et mercatur
Caelum per supplicia.

4 a. Pollet Paulus in doctrina
Oleoque miscens vina
Fulget in ecclesia.

4 b. Ense Paulum Nero stravit,
In lacrimis seminavit
Modo metit gaudia.

5 a. Ante Deum qui lucetis,
Candelabra, nobis detis
Clara frui regia.

5 b. Caeli claves, aperite

Caelum nobis et ad vitae
Nos ferte palatia.