276. De sancto Quintino.

1 a. Verbum pater eructavit,
Verbi rore germinavit
Quintinus ut lilium.

1 b. Regnum tenens hic supernum

Ibi floret in aeternum

Ante Dei filium.

2 a. Iste suis in diebus

Mundus, mundi carens rebus,
Mundus labe criminis,

2 b. Lege fulsit in divina
Quasi stella matutina
Medio caliginis.

3 a. Qui pro lege Dei sui
Est candentis passus sui
Dorsum ferri sudibus.

3 b. Nec tormentum sive necem
Fugit fixus ungues decem
Clavorum cuspidibus.

4 a. Dorsum rastris exaratur,
Exaratum irrigatur
Imbre sui sanguinis.

4 b. Cultor bonus hoc examen
Perfert propter pullulamen
Sacri verbi seminis.

5 b. Decollari cum iubetur,
Ut tyranni satietur
Inhumana rabies,

5 b. Cervix eius est abscisa,
Et volare hinc est visa
Columbina species.

6 a. Aulam caeli scandit ita,
In qua vera viget vita
Luce fervens sedula,

6 b. Cuius prece Deo grata
Stola vitae Deo data
Vivamus in saecula.