283. De sancto Samsone.

1 a. In Samsone

Deo sit gloria,
Quem abundans
illustrat gratia
Et superabundans ;

1 b. Cui conceptus

ante primordia
Nomen dedit
visio nuntia,

Sterilem fecundans.

2 a. Hoc censeri

nomine meruit,
In Samsone

quae tanta claruit,
Virtus meritorum.

2 b. Quem distendit
virus infusio
Et chelydri
dira percussio,

Sonat "sol eorum

3 a. Ex defectu

mel magis sufficit,
Et de petra
latices elicit

Moyses secundus.

3 b. Innocuum

potatur toxicum,
Sacerdotem

vexat veneficum
Spiritus immundus.

4 a. Angelicos

secutus monitus
Exsilii

subit interitus,

Dives paupertatem.

4b. Geminantur

privati gaudia,
Recipiunt
uxor et filia

Plenam sospitatem.

5 a. Serpens Dei

trahente famulo
Mansuescit

in eius cingulo,
Et lucente

tali miraculo
Convalescit

fides in populo.

5 b. Caecum sanat

petens palatium,
Ab obsesso

fugat daemonium,
Perit leo,

quem habet obvium,
Et reginae

mutatur odium.

6 a. Pietatis adfluentis

Pectus movet vox deflentis
Matris propter filium ;

6 b. Matris dolor revocato
A defunctis sibi nato
Remigrat in gaudium.

7 a. Fratrum quies molestatur,
Sed clausarum castigatur
Avium garrulitas.

7 b. Prata vertens grex porcorum
Fit repente grex hircorum,
O miranda novitas !

8 a. O mirande transformator,
Nove rerum immutator
Sanitatum reparator,

8 b. Lux exempli, morum forma,
Ad virtutes nos reforma
Atque Christo sic conforma,

9 a. Ut in regno claritatis
Nobis sibi conformatis
Rex aeternae caritatis

9 b. Vitae donet praemia.
Amen dicant omnia,
Succurrat laetania.