284. De sancto Savino.

la. Adest nobis venerandus
Praesens dies et optandus
Toto mentis gaudio

1 b. De Savini, gloriosi

Patris nostri ac patroni,
Festo beatissimo.

2 a. Hic confessor Christi dignus
Prudens fuit ac benignus
In cunctis operibus,

2 b. Simplex, rectus et quietus,
Humilis et mansuetus
Omnibus fidelibus.

3 a. Placentinam urbem rexit
Vigilanter et protexit
Suis in temporibus.

3 b. In cultura conditoris

Contra bellum temptatoris
Monitis et precibus.

4 a. Haec fecit in spiritali,
Nec ob hoc in temporali
Defuit regimine ;

4 b. Nam curans interiora
Servavit exteriora
Provido libramine.

5 a. Quadam vice Padus ruens
Super terram, undas urgens
Occupat ecclesiae

5 a. Praedia, possessiones,
Fructus omnes et labores
Editos ex semine.

6 a. Sed antistes Christi mirus,
Spe refulgens ut saphirus,
Mittit monitorium

6 b. Pado, mandans atque iubens,
Ut cessaret prorsus linquens
Suum territorium.

7 a. Flumen cessit et recessit
Et posthaec nunquam excessit
Sui cursum alvei,

7 b. Sed de cetero sic stetit,
Sicut sanctus vir praecepit
In virtute Domini.

8 a. Pro hoc Christus, quem amavit,
Corpus sibi revelavit
Antonini martyris,

8 b. Monens, ut removeretur
Et in tumba conderetur
Victoris pontificis.

9 a. Unde clero convocato
Populoque congregato
Pergit ad ecclesiam.

9 b. Ubi mox sex advenerunt
Praesules, qui dicaverunt
Martyris memoriam.

10 a. Tali vita decoratus,

Tantis signis adornatus
Savinus clarissimus

10 b. Modo gaudet cum electis,
Modo sedet cum perfectis
In supernis sedibus.

11a. Ergo, fratres, veneremur
Patrem nostrum et sectemur
Ipsius vestigia,

11b. Ut in caelis collocemur
Et cum ipso gloriemur
Per aeterna saecula.