286. De sancto Servatio.

1 a. Salus data Galliae
Dono Dei gratiae,

Beatus Servatius,
De genere Mariae
Illuxit ecclesiae

Solis uti radius.

1 b. Gaudium nostrae spei,
Sicut stella diei,

Fulsit in templo Dei,
In quo spem habent rei
Eius prece provehi
Aeternae requiei.

2 a. Tus ut ignis ardore
Dulcifluo odore

Circumquaque spargitur,
Sic istius dignitas,
Almiflua sanctitas

Per mundum extenditur.

2 b. Nam fulget virtutibus,
Quas Deus potentibus

Impendit fidelibus,
Ipsum requirentibus
Pro suis excessibus

Sancti huius precibus.

3 a. Mira abstinentia
Sugentis infantia

Praeter morem claruit,
In die ab ubere
Semel Dei munere

Lactatus abstinuit.

3 b. Spectabilis iuvenis,
In verbis, factis lenis,

Solimam aggreditur,
Christi factus hostia
Per multa ieiunia,

Quibus hic affligitur.

4 a. Hinc sacerdos effectus,
Cum angelo profectus

Fit urbi Tongrensium
Praesul, gemma praesulum ;
Angelus dat baculum

In conspectu omnium.

4 b. Quantis signis claruit,
Quam sanctus apparuit

Hoc in episcopio,
Soli Deo est scire,
Cui studuit servire

Opere, consilio.

5 a. O sanctum pontificem,
O populum felicem,

Tali dignum pastore,
Regi caeli dilecto,
Ab angelo electo

Non hominum favore;

5 b. Qui haeresim Effratae
Catholico dogmate

Destruendam docuit;
Ipsum vero damnatum
Ob erroris reatum

Degradandum censuit.

6 a. Lapis altaris fractus,
Manu sacrata tactus,

Integer efficitur ;
Populus a dracone,
Cuius vexatione

Perit, liber redditur.

6 b. Cum Roma revertitur,
Capitur et trahitur

Imperante Attila;
Ad solem exponitur,
Sed nequaquam laeditur

Obumbrante aquila.

7 a. Petro salutifero

Non impar clavigero

Meruit accipere
Potestatem tam gratam,
Per clavem ei datam,
Ligare ac solvere.

7 b. Nota Dei amicum,
Cui de caelo sericum

Angeli attulerunt;
Quem vivum dilexerunt,
Mortuo servierunt,

In caelum sustulerunt.

8 a. O beate Servati,
Commenda deitati

Servos tibi deditos ;
Caeli iungens civibus
Tuis purga precibus

Peccatis implicitos.

8 b. Te quaerentes ex corde,
Expiatos a sorde

In extremis visita
Et, sicut consuevisti,
Introduc regno Christi

Per eum, qui est vita.

9. Da, Deus, ut sit ita.