295. De sancto Stephano.

I a. Rosa novum dans odorem
Ad ornatum ampliorem
Regiae caelestis

1 b. Ab Aegypto revocatur,
Illum sequi gratulatur,
Cuius erat testis.

2 a. Genus nequam et infaustum,
Qui se fecit holocaustum,
Afficit indigne

2b. Eum, quod in Christum cre-
dit,
A quo tamen non recedit
Passionis igne.

3 a. Gaudet carne purpurata,
Flexo genu, voce grata
Pro Iudaeis orans,

3 b. Ut non illis imputetur,
Quia gratis pateretur,
Facinus ignorans.

4 a. Constitutum in spe certa
Certiorat rex aperta,
Quando Iesum vidit

4 b. Stantem patris in virtute,
Tunc ad petram pugnans tute
Parvulos allidit.

5 a. Uva data torculari

Vult pressuris maculari,
Ne sit infecunda:

5 b. Martyr optat petra teri
Sciens munus adaugeri
Sanguinis in unda.

6 a. Nos, qui mundi per desertum
Agitamur in incertum,
Stephanum sequamur,

6 b. Ut securi tanto duce
Trinitatis vera luce
Iugiter fruamur.