299. In Inventione s. Stephani.

1 a. Stephani, Gamalielis,
Abibon et Nicodemi
Festa dignis laudibus

1b. Recolamus, quod fidelis
Gamaliel ipsos demi
Iussit suis scrobibus,

2 a. Sepulturae docens locum
Et per rosas et per crocum
Ac metallum calatorum

2 b. Nominatim certificans
Et his signis notificans
Reliquias singulorum.

3 a. Namque tres erant aurei,
Duo rosis albis pleni
Et tertius rubeis,

3 b. Quartus erat ex argento
Croco plenus; certitudo
Sic redditur de eis.

4 a. Gamaliel, Nicodemus
Albis rosis et Stephanus
Rubeis, auro signatur

4 b. Abibon quidem argentum
Et redolens crocus mundum
Ab utero protestatur.

5 a. Haec sancta revelatio
Facta est ter Luciano
Et sancto Migetio,

5 b. Sed cum magno gaudio
A Ierosolymitano
Praesule translatio.

6 a. In quorum translatione
Odoris emissione

Sanitas est multis data,

6 b. Et ab aere siccitas
Et a terra sterilitas
Divinitus est sublata.

7 a. Igitur, sancti praedicti,
Rogate, ut benedicti
Ascribamur in gloria

7b. Et, dum vivimus, mundari

Mereamur et purgari

A peccati scoria.