300. De sancta Theodosia.

1 a. Virginis eximiae
Festum Theodosiae
Recolat ecclesia,

1 b. Quam dotarunt hodie
Castitatis nuptiae
Visione regia.

2 a. Haec aetate tenera
Sprevit mente libera
Carnis lenocinia

2 b. Et datis muneribus
Iunxit se martyribus
Clausis in custodia.

3 a. Quorum sanctis precibus

Haurit a caelestibus

Agonis solacia ;

3 b. Terrorem praetorii
Sprevit spes martyrii
Cum Dei fiducia.

4 a. Post haec luctam conserunt
Et de suis conferunt
Fides et perfidia ;

4 b. Virgo causa fidei
Tolerat eculei
Poenas et suspendia.

5 a. Fides armat virginem,
Praeses amat sanguinem
Ferali sententia.

5 b. Diversorum generum
Poenarum et verberum
Concurrit instantia.

6 a. Laceratur uncinis

Sacrum corpus virginis
Lictoris insania,

6 b. Et suspensa crinibus
Fame et non dapibus
Vivit Dei gratia.

7 a. Inde flammis tradita
Et feris exposita
Vincit has et maria.

7 b. Tandem ictu gladii
Intrat terram gaudii,
Ubi pax et gloria.

8 a. Huius festum colimus
Et colendo psallimus
Sollenni laetitia.

8 b. Collaudemus igitur
Eum, pro quo patitur
Virgo Theodosia.

9. Deus, actor gratiae,
Astanti familiae
Donet vera gaudia.