304. In Translatione s. Thomae Aquinatis.

1 a. In praesenti incolatu

Festa Thomae cum conatu
Celebret ecclesia.

1b. Gloriosus hic est natu
Et excedens doctoratu
Scripturae facetia.

2 a. Cuius ortus prophetatur,

Matri suae dum adfatur

Homo plenus spiritu:

2 b. Erit frater praedicator,
Veritatis indagator
Pro salute populi.

3 a. Ab ordine rapitur
Et in turri ponitur
Sicque captivatur,

3 b. Per puellae speciem
Eius innocentiam
Turbare conantur.

4 a. Sed, cum ignis titione
Necnon bona ratione
Effugavit feminam,

4 b. Humili prostratione
Et magna devotione
Petit continentiam.

5 a. Ab angelo consolatur

Et cum stola circumdatur
Exsistens in carcere;

5 b. Sicquc Thomas praeservatur
Nec in carne maculatur
A funesto scelere.

6 a. Petrus, Paulus veniunt,
Intellectum conferunt
Thomae dubitanti.

6 b. O quam magni meriti,
Cui cives caelici
Tales astant sancti!

7 a. Nullo prorsus fulcimento
Sustentatus, elevatus,
Sursum stans in aere.

7 b. Crucifixus commendabat,
Quod de ipso scriptitabat
Tam venusto schemate,

8 a. Et mercedem promittebat,
Quam ab ipso deposcebat
Pro laboris praemio.

8 b. Nil terreni praeoptabat,
Solum Christum affectabat
Habere pro gaudio.

9 a. Laudes ergo decantemus
In hac die, iubilemus
Voce plena ;

9 b. Psallat mater ecclesia
Pro doctoris scientia
Tam amoena.

10 a. Nunc ergo nos emendemus,
Sanctum Thomam invocemus
Prece semper sedula,

10 b. Ut Iesu Christo conregnemus,
Ad promissa aspiremus
Sempiterna gaudia.