305. De s. Thoma Cantuariensi.

1 a. Gaude, gemma praelatorum,
Consolator peccatorum,
Psalle cum tripudio ;

1 b. Omnes tibi congaudendo
Iubilemus, te promendo
Carminum praeludio.

2 a. Praesul Christi gloriose,
Thoma, martyr pretiose,
Sanctitatis speculum,

2 b. Vernas tuos semper rege,
Ne damnemur falsa lege,
Sol illustrans saeculum.

3 a. Stella splendens matutina,
Per quam lucet lux divina,
Taetram pellens nebulam,

3 b. Te produxit stirps Anglorum
Strictam tenens regulam.

4 a. Honor tuae puritatis
Dat candorem castitatis
Et decorem gratiae;

4 b. Aetas tuae iuventutis
Ornamentum est virtutis
Et lux pudicitiae.

5 a. Numen verum te vocavit

Tamquam Aaron, quem formavit
Sacro sacerdotio,

5 b. Rore caeli dum purgavit
Tuam mentem, quam rigavit
Animae devotio.

6 a. In te signum
Fulget dignum,
A Maria,
Matre pia,

Consutum cilicium.

6 b. Capellano
Mox devoto
Corde sano,
Nisu toto

Tu reddis officium.

7 a. Diffamatur, fiunt plura,
Quae negantur a natura;
Sic cedunt miraculo ;

7 b. Surgit sanus, qui gravatur
Febre, simul et curatur
Claudicans in baculo.

8 a. Tandem martyr trucidatur,
Modulamen inchoatur
Fletus et tristitiae;

8 b. Sicque luctus permutatur,
Dum ab angelo prosatur
Canticum laetitiae.