308. De sancto Udalrico.

1 a. Universi iubilemus,

Divum praesulem laudemus,
Genitum proceribus;

1 b. Infans aeger ablactatus
Udalricus, confortatus
Piis fulget moribus.

2 a. Dogma capiens salutis

Claustro Wibrath fatis tutis
Antistes praedicitur;

2 b. Adalberoni traditus,
Virtute lucens penitus
Curiae praeficitur.

3 a. A summo hinc pontifice
Susceptas honorifice
Hedrae fugit apicem ;

3 b. Sublimatus in mandritam
Annos per quindenos vitam
Mire duxit supplicem.

4 a. Lexivernae visionem

Complens bis ostensionem
Dextrae summae recipit.

4 b. Petri, Afrae gaudet ore
Vir devotus in sopore,
Se obsessum eripit.

5 a. Reti leti duos prendens,
Ternum daemone offendens
Punit sacrilegium.

5 b. Pacans Caesarem cum nato
Duce Hunnico prostrato
Templum mox egregium

6 a. In honore Afrae struit;
Hortulanus poenas luit,
Sanctus quas praenuntiat.

6 b. Ossa sacra Thebaeorum
Pluriumque beatorum
Gregi suo sociat.

7 a. Caducum morbo liberat,
Oleo visum reparat,
Quo et se delibuit.

7 b. Vindicem it non rigatus,
Ast Danubio ablatus
Prece Thar detumuit.

8 a. Uires pedum moniali
Reddens via synodali
Pauper nummo valuit;

8 b. Captam coniugi univit,
Quiris exhumatus vivit,
Baculo fons patuit.

9 a. Servos Orci ligat verbis,
Itineribus acerbis
Corrigit iconimum.

9 b. Reni animas redemit,

Ursum sagmas ferre premit
Principem magnanimum.

10 a. Anno dicit moriturum,
Absolutos in securum
Tres remittit saeculum.

10 b. Scit nepotem exspirasse
Et Conradum non migrasse,
Compar orbis speculum.

11 a. Infirmatus missas canens
In cubiculo post manens
Fraglat linquens spiritum.

11b. Udalrice, Cbristo care,
Sempiternum evitare
Stude nos interitum.