309. De sancta Ulphia.

1 a. Ulphiae gloriam

Celebrent laudibus

Eius memoriam

Novis et cantibus

Exornent virgines;

Terrae concentibus

Adplaudant caelites.

1 b. Alta consilia

Pudici pectoris

Gestaque fortia

Tenellae virginis

Quis non mirabitur?

Digna praeconiis

Quae vox aptabitur?

2 a. Splendore generis

Eminet inclita,

Iuncta divitiis

Formae praestantia,

Cunctis prodigium ;

Fiunt tot munera

Ipsi contagium.

2 b. Mundus alliciens

Offert divitias,

Ostentat blandiens

Opum fallacias,

Plus adversaria

Urgens ad nuptias

Adest familia.

3 a. Annis sed primulis

Iam se virgineo

Instinctu numinis

Strinxerat vinculo.

Quid iuvat furere,

Satan? Non poteris

Promissa rumpere.

3 b. Timens naufragium

Et pacti conscia

Placentem nimium

Pia saevitia

Vultum dilacerati

Nec sat, inedia

Se totam macerat.

4 a. Haud tamen propriis

Confisa viribus

Nec ab insidiis

Tuta latentibus

Decernit fugere

Et certaminibus

Sic finem ponere.

4 b. Cunctis impervium

Procul a patria

Quaerit hospitium;

Loca silvestria,

Consita vepribus,

Praebent tuguria

Densis in saltibus.

5 a. Amore fervida,

Imis recessibus

Dum latet abdita

Et a terrestribus

Se videns exsulem,

Vitam caelestibus

Ducit consimilem.

5 b. Eremi socium

Christi discipula

Habet Domitium;

Ductoris aemula

Terit vigiliis

Virgo corpusculum,

Terit ieiuniis.

6 a. Defessis artubus

Quies abnuitur,

Singulis noctibus

Somnus abrumpitur;

Via fit horrida,

Non minus pergitur

Ad templi limina.

6 b. Emissa caelitus

Que vox nunc assonat:

Exsurge citius,

En, sponsus te vocat,

Festina, quaesitam

Tantis agonibus

Suscipe lauream.

7 a. Salve, flos vallium,

Nostra spes, gloria,

Te turma virginum

Praetendens lilia

Salutat sociam,

Orantem Maria

Exspectat filiam.

7 b. Hanc tibi agnitam

Nunc gentem respice,

De novo deditam

Benigna suscipe,

Antiqua pietas

Te regnet auspice,

Regnet et castitas.